سلام عليكم ,, خلاص صعيدى ايوة ومع سبق الاصرار والترصد كمان , ومفيش عنوان مثالى غير العنوان دا يمكن الكلام دا هيجى على جرح ناس كتيرة ويمكن ناس كمان ممكن تشتمنى وممكن ناس تلعن اليوم اللى قرت فيه التدوينة دى لكن انا أملى فى ربنا كبير قوى لاصحاب الضمائر فقط ,
دايماً بنشوف الاعلام والجرايد وكل وسائل الاعلام فى مصر ازاى بقت جميلة بعد الثورة وبتهتم بالصعيد ! فعلاً الثورة اثرت تأثير ايجابى على الصعيد وبقى ياخد حقه الاعلامى ,
——
طيب سؤال على هامش الكلام فى الاعلام والصحافة حد يعرف كام عدد محافظات الصعيد ؟
طيب حد يعرف اى محافظة بالصعيد فيها اعلى نسبة ” امية ” فى مصر ؟ طيب سؤال اسهل من كدا هل حد يعرف اكبر جامعة فى الوطن العربى من حيث المساحة والاقدمية ؟ طيب سيبكم من دا كله حد يعرف اكبر مصنع لانتاج الالومنيوم فى الوطن العربى من حيث المساحة فين !!
ما علينا ايه الاسئلة اللى ملهاش طعم دى يا عم الصعيدى انت؟ ما تدخل فى الموضوع وتنجز مش كفايا علينا العيال اللى خربوا البلد وعاوزين يولعوا فيها ؟
—–
حسناً ندخل فى الموضوع ,,,
انا كشاب صعيدى اتولدت فى اقصى الجنوب بمصر محافظة قنا , شاركت وغيرى شارك فى الثورة باى طريقة او وسيلة كانت وفى شباب كتير وبنات من صعيد مصر من كافة المحافظات شارك فى الثورة العريقة العظيمة ثورة 25 يناير علشان تغيير حرية عدالة اجتماعية !!!
عدالة اجتماعية , ونحط تحتها الف والف خط احمر وهقولكم ليه
لما يكون فى قرى فى الصعيد معندهاش كهرباء والسد العالى اقرب نقطة ليها ! وفى ذات الوقت محافظات اخرى تستمتع بالكهرباء ليل نهار ! الصعيد مميز بالجو الحار صيفاً والجو البارد شتاءً تخيلوا اسر على قد حالها فى البرد دا من غير كهرباء وضعهم بيكون ازاى ؟
عدالة اجتماعية فى توزيع الكهرباء ايوة واللى حتى الان ما حصلش ومئات من القرى مفهاش كهرباء
عدالة اجتماعية فى الحصول على رغيف العيش ابو 5 قروش اللى علشان واحد زى حالاتى يشتريه لازم اروح للمخبز الساعة 6 الفجر لان المخبز مش بيوزع عيش غير من 6 الصبح لغاية 7 ونص وبعد كدا بح خلاص مفيش عيش تصيم لغاية بكرة وطبعاً فى ذات الوقت الصعيد معروف ومشهور بزراعة القمح , وفى ذات الوقت فى ناس رغيف العيش بيوصلها لغاية باب البيت ! اين العدالة هنا ؟
منذ ايام وانا فى البيت فى بنت صغيرة تقريباً عندها 9 سنين بتعيش فى ” عزبة ” قريبة منى وانا عايش فى مدينة ومجمع سكنى وكانت بتبيع ” خضار ” وبتلف على البيوت وشايلة ” المقطف ” على دماغها وزنه ما يقلش عن 20 كيلوا , سالتها بكل عفوية قليلى يا بنتى انتى نفسك في ايه بعد ما عملنا الثورة دى اكيد انتى سمعتى بيها طبعاً , قالتلى بدون تردد ايوة يا ساعدة البيه كنت بشوف الشباب والثورة على التلفزيون نفسى اشترى العيش فى اى وقت وبسهولة واقدر اكمل تعليمى والاسعار ترخص !!
طبعاً الردود انا متوقع شكلها هيكون ازاى على الموقف دا وان فى ناس كتيرة هتكتب لا يا حبيبى الموضوع منتشر فى كل مصر مش فى الصعيد بس !
انتبهوا يا سادة نحن فى الصعيد لسنا احسن من غيرنا , نحن هنا ننحت فى الصخر , نحن نتقاتل من اجل التوعية وفضح الفساد !
الصورة ليست كما ترونها فى الاعلام القذر او الصحافة المضللة الصورة ليست زاهية كما ترونها دائماً , الموضوع بشع بشع بشع
ايها السادة نحن 9 محافظات
الفيوم
بنى سويف
المنيا
اسيوط
سوهاج
قنا
الاقصر
اسوان
الوادى الجديد
البحر الاحمر
{صعيد مصر – ويكيبيديا، الموسوعة الحرة http://bit.ly/zeIJFV }
عدوا يمكن فى محافظات تنتمى للصعيد ولا اعلمها
كل يوم يوم ببكى بدل الدموع دم , كل يوم نفس المنظر بتاع القتال على مخابز العيش , كل يوم نفس البنت اللى بتبيع الخضار وبتلف على البيوت وسابت تعليمها كل يوم قرية جديدة مش وصلها نور كل يوم حرب على اسطوانات الغاز كل يوم ناس بتحارب علشان تحصل على الجنيه فى شغلها
—-
انا مش عايز اسود الصورة فى نظركم لكن الناس بتستهين بالصعيد بل فى ناس بتتعمد انها تظهر الصعيد فى ازهى وانقى صورة
قسماً بربى الصورة اسوأ مما تتخيلون , الناس الغلابة المزراعين الناس اللى على باب الله اللى رزقها يوم بيوم كل الناس دى بتقول بكرة هيكون احلى والحال هيتعدل وحال البلد دى هيتزبط وهيكون فى عيش الناس تشتريه بالساهل فى كهرباء هتوصل لبيوتنا فى مية هتوصلنا وصرف صحى هيوصلنا فى غاز طبيعى هيوصلنا ازمة اسطوانات الغاز هتتحل , الناس بتوصل لمرحلة اليأس هنا كل ما اتكلم مع راجل غلبان على باب الله بيسترزق احياناً بيسب لليوم اللى اتعملت فيه الثورة , كل ما اتكلم مع سواق تاكسى برضه بلاقى احياناً نفس الكلام دا وانا هنا مش بعمم طبعاً انا بسجد كل يوم شكر لله على الثورة ,
—–
لكن من حق الناس تحس باى تغيير يا عالم اى تغيير ولو حتى الاعلام يسلط الضوء على الصعيد بما يرضى الله ويرضى اى بنى ادم زى حالاتى عايش فى الصعيد , قسماً بربى كارثة حين يكون هناك 9 او 10 محافظات بصعيد مصر ولا ينشر خبر او برنامج لهم على القنوات او الجرايد الا فى المصايب او الاسطوانة المشروخة والتى كانت من تأليف النظام البائد ” الفتنة الطائفية ” اين ضمائر المصريين اين من ينادون بالديمقراطية ! اين من يتقاتلون من اجل كراسى البرلمان ! هل سنرى التغيير يوماً ما هل سوف اشترى الخبز ذا ال 4 قروش فى اى وقت احب ؟ ام ليس من حقى ؟ هل الغلابة هيوصلهم نور ومية وهما اقرب ناس للسد العالى !
——
استحلفكم بالله نحن لا نريد مساعدة من احد , نحن نحتاج الى تحكيم ضمائرنا فقط واقامة العدالة الاجتماعية فى مصر بالكامل وليست بعض المحافظات فقط , نريد عدالة فى الاكل فى الشرب فى العمل فى التوعية فى الاعلام فى الصحافة فى فى فى والقائمة كل يوم بتطول اكتر واكتر
——
لما احب اشترى كتاب جديد او احضر فيلم نفسى اتفرج عليه فى سينما او عايز احضر مؤتمر معين او نشاط تنموى معين او لو عايز اشترى قطع غيار للاب توب بتاعى او العربية بتاعة والدى او لما احب اخد منحة معينة من البلد عارفين لازم اعمل ايه لازم اسافر 9 او 8 ساعات للقاهرة علشان اعمل دا كله ! واحياناً اكتر من كدا ومحتاج 150 جنيه مصاريف مواصلات الذهاب والعودة فقط ! طبعاً الكلام دا ميت الف مرة اكتبه واقوله واسمه معروف وفى ناس كتيرة بتعانى منه مش فى محافظات الصعيد بس لا بل فى محافظات الدلتا كمان ودى كانت صدمة وطامة كبرى لما اصحابى اللى فى محافظات الدلتا اشتكوا نفس الشكوى
تباً للـــــمــــركـــــــزيــــــــة ومن يدعمها حتى الان
——
نيجى بقى لاصحاب المبادرات الرائعة والمؤسسات الاروع واللى هقوله دا عانيت منه بناء على تجربتى الشخصية , بمجرد اى مبادرة او منظمة او مؤسسة بتنطلق ربحية او غير ربحية لما تيجى تكلمهم وتقولهم فين الصعيد ! يقولك الله احنا هنموت ونوصل للصعيد هنتجنن وندخل الصعيد وان شاء الله هندخل ونخترق الصعيد بالكامل وخليك متابع معانا لاننا هنحتاج مساعدتك معانا كلام كلام كلام كلام ونيجى وقت الجد لا حياة لمن تنادى وفعلاً اى مؤسسة او منظمة او مبادرة كبيرة بتقول انها عملت انجاز فى الصعيد فانا بتعتبر الكلام دا كدب فى كدب لان الصعيد مش صغير ولا بيت او اتنين او قرية او اتنين او محافظة او اتنين ,,, طبعاً مع كامل احترامى لقلة من المؤسسات والمبادرات اللى فعلاً اخترقت الصعيد وبدأت بجد تساعد فى تنمية وتوعية وتطوير الصعيد ومحافظته
——-
تصدقوا بالله ! لا اله الا الله انا كمحمود جالى عروض شغل كتيرة وخصوصاً الشهر اللى فات دا وبرضه رفضت مش لان الشغل مش عاجبنى لا بقول بكرة هتروق وتحلوا فى الصعيد وما ينفعش اسيب الصعيد كدا وامشى لازم اساهم واطور واساعد فيه على قد ما اقدر وبحاول اعمل تويت اب او ميت اب او اى تجمعات للشباب المبادر وبتنطط كل شوية من محافظة لمحافظة على أمل انى اقدر اساهم فى اى حاجة حتى لو كانت بسيطة انا مش بقول الكلام دا ك كبرياء او فخر الخ لا بس علشان الناس تعرف اننا بننحت فى الصخر انا او غيرى من الشباب , ورد برضه على اللى هيقول ما تبدأ انت بنفسك يا عم الحج وبطل الكلام اللى مليان احباط دا ورد على اى واحد هيشتمنى برضه 😀
——-
اتمنى تفكروا فى الكلمات دى بعد ما قريتوا كل الكلام اللى مالوش لازمة فوق دا لو بتحبوا بلدكم بجد
مركزية
عنصرية
امية
تعليم
خبز
كهرباء
ماء
صرف صحى
غاز طبيعى
توعية
مؤسسات
مبادرات
انشطة
لو شايف ان نشر الكلام دا مهم لغيرك وهيفيد بلدك فى تسليط الضوء على الصعيد انشره
جميع حقوق النشر محفوظة لكل مصرى حر عنده ضمير !
انا دايماً مبتسم حتى شوفو الصورة اللى فوق دى 🙂
انا دايماً بقول بكرة احلى وعندى امل فى ربنا كبير مهما كان الكلام اللى كتبته كله حزن وفقدان للامل لكنها الحقيقة
وبكرة أحلى إن شاء الله
إمضاء صـــعــــيدى
