السلام عليكم ورحمة الله وبركاته ,

وحشتونى جدا  جدا جداً ,

التدوينة دى هتكون باللغة العربية العامية المصرية القاهرية البحتة لذا وجب التنويه

اولآ: اتقدم بالاعتذار لكافة متابعى المدونة عن قلة التدوين وهذا بسبب ظروف العمل الجديدة والسفر الى القاهرة واتمنى ان تدعو لى بالتوفيق فى العمل الجديد

ثانيا: هذه التدوينة عن احداث حقيقية حدثت لى ومازالت تحدث هنا ب القاهرة ولا يوجد بها اى مبالغة او اساءة الى اى بلد او محافظة فقط احببت ان افرغ ما لدى بمدونتى

وان تشاركونى الحوار فلنبدأ على بركة الله

بداية مدة سفرى من المحافظة التى اعيش بها الى القاهرة بالقطار هى بمعدل 8 – الى – 9 ساعات تقريبا وساعات بتوصل ل 12 ساعة لو امك داعية عليك يا خويا

وصلنا الحمدلله وكله تمام والرطوبة كان من شهر حاجة عجب العجاب يعنى الساعة 5 العصر وفى شبورة وحاجة غريبة تحس انك داخل مستنقع او فى كهف ومليان بخار

احساس غريب لاى واحد عايش فى الصعيد بعيداً عن الرطوبة دى .. ما علينا المهم وصلنا وكله تمام الحمدلله طبعا كالعادة المية فى النهار بتكون ضعيفة جدا ..

يعنى اللى عايز ياخد شاور يلم نفسه وياخده بالليل … هتقولى ركب ماتور علشان يسحب المية ! كان غيرك اشطر القاهرة كلها مركبة مواتير يعنى هى هى الحكاية فبلاش فهلوة من اول التدوينة واسمع الكلام للاخر يا خويا وما تعصبش نفسك البلاوى جايه فى الطريقة

السبب الرئيسى اللى خلانى اكتب التدوينة دى هى المواصلات ؟؟ ايوه المواصلات انا انسان تافه وبكتب عن المواصلات

اسمع واقرا للاخر بس ووسع بالك وصدرك معايا وولع سيجارة كدا وركز فى الكلام ,,

يومياً بصحى الساعة 7 الصبح اه معاد شغلى الساعة 9 بس انا مش ببيع لبن والله انا ” مدير تسويق ومبيعات ” لشركة استضافة وتصميم وبرمجة مواقع هكتب عنها فى تدوينة لوحدها قريباً ان شاء الله تعالى لما افضلى ,, بعد ما بصحى بزبط امورى بنزل على الساعة 8 الا ربع كدا دا كدا يعتبر انا متأخر حوالى تلت ساعة باخد نص ساعة علشان الاقى عربية مينى باص للسلام اللى بتكون رايحة موقف العاشر من رمضان مش العاشر من رمضان لا موقف العاشر من رمضان يبقى كدا زى الكتاكيت هناخد طريق روكسى وقبل الكوبرى هنننحرف بالمينى باص وناخد طريق جسر السويس الله يلعنه 🙁 ,, حوالى ساعة ونص او ساعة على الاقل فى المينى باص واحيانا ساعة الا ربع لو فى يوم زى 6 اكتوبر مثلا ” نفسى كل الايام تبقى 6 اكتوبر ” اه والله زى ما بقولكم كدا دى مش مبالغة ولا حاجة ندخل يا سيدى فى المينى باص الجميل طبعا تكييف طبيعى مفيش حر نهائى اكتر حاجة هتعجبك التراب اللى داخل من الشبابيك 🙂

طبعا دا اتوبيس مش مينى باص وعمرى ما ركبته غير مرة واحدة فى طريق من الشغل للبيت وكانت اول واخر مرة ودعيت الف مرة على واحد من الشباب اللى شغالين معايا فى الشركة انه خلانى اركبه وعلى فكرة الصورة دى يعبتر مش زحمة قوى مقارنة بالحقيقة ” بتكلم بجد والله ”

نرجع تانى للمينى باص تقريبا بيوقف اكتر ما بيمشى بس لما بيمشى بيكون سريع جدا فلازم تكون فى حاجات مهمة الواحد بيعملها قبل ما يتوكل على الله ويركب المينى باص

تقدروا تسموها او اسميها انا

شروط الخروج من البيت للعمل فى القاهرة بواسطة المينى باص :

1 : – قراءة الفاتحة والمعوذتين واية الكرسى وطبعا اهم حاجة انك تتشهد اكتر من مرة ” محدش عالم هترجع بيتكم ولا لا يا ولدى “.

2 : – لازم لازم تاخد اى حاجة على الريق علشان تقدر تتحمل البلاوى اللى هتشوفها حتى ولو ” 3 بلاحات ” البلح رخيص اليومين دول :).

3 : – اياك تخرج وانت لابس شبشب او ” صندل ” خروج لازم جزمة او كوتشى يتحمل الصعاب اللى هتواجها فى المينى باص , لو لبست شبشب انسى رجلك او ارزع بنج موضعى لرجلك الاتنين خصوصاً الاطراف 🙁 .

4 : – اياك وان تبتسم انت وفى طريقك سواء كنت راكب المينى باص او لا هيعتبر انت كدا سعيد ودا مخالف لسياسات الناس اللى راكبه معاك لازم تكون مكشر “ لاوى بوزك ” يعنى

5 : – انعدام النخوة والمروءة والرجولة والشهامة والحماشة فى المواصلات خصوصاً لو كنت شاب من 20 ل 35 سنة . ” ما تقفش لاى حد ” مهما حصل وبالمناسبة انا صعيدى الحمدلله وكل الصفات دى بيمتاز بيها اى شخص صعيدى وغصب عنى بقف لاى حد كبير فى السن رجالة او ستات او شابات  او شاب تعبان مثلاً واول ما بقف لحد من الفئات دى كل اللى راكبين معايا بيبصولى بصة غريبة جدا كأنى ارتكبت جناية ؟؟ او عملت خطيئة فى الزفت المينى باص ؟؟ هو يا شباب وشبات كايرو انا فعلاً عملت كدا ؟للاسف الشديد واللى بيخلينى ابكى انا وفى المواصلات هو انعدام المرءة بجد شىء مخزى لما واحدة تكون واقفة فى الطرقة فى المينى باص والناس اللى قاعدة بترسم فيها من تحت لفوق ومن فوق لتحت وما خفى كان اعظم طبعا كل اللى نازل حتة لازم يتلزق فيها ويلمسها ويتحرش بيها من الاخر حتى لو هو كان انسان محترم هتتحرش بيها غصب عنك مش بمزاجك يا حبيبى !! لان الطرقة بتعت المينى باص يدوب شبر ؟ وهى مسكينة مفيش بيدها حاجة ولا هتتكلم ولا انت هتتكلم الموضوع دا عايز تدوينة لوحدها والله لانه حارق دمى قوى قوى ومقهور من شباب القاهرة دول !! مش كلهم 99% بس منهم :).

6 : – لازم تكون كل انواع العملات المصرية معاك خصوصا النص والربع جنيه وتكون فضية مش  ورق حديد يعنى يا صعيدى 🙂 . والا هيتنصب عليك فى الاجرة .والجميل فى موضوع العملات دا ان المصريين مش الصينين عملوا حاجة زى ميدالية كدا جميلة تحفظ فيها العملات علشان ما تقوعش منك بجنيه ونص تقريبا .:)

7 : – حط جزمة قديمة فى بؤقك وما تتكلمش مع اللى جمبك ولا فى مطش كورة ولا فى سعر الطماطم اللى طفش مرة واحدة ووصل ل 12 جنيه .. والا كل المينى باص هيرغى معاك وهتكون عامل زى بتوع الشؤون الاجتماعية .

8 : – اياك ان تنسى تنبه 60 تريليون مرة على التباع بتاع المينى باص على المكان اللى هتنزل فيه بعلو صوتك اه ما تتكسفش هو كدا لازم كدا .

9 : – ممنوع التدخين طبعا الا لو كنت انت السواق !!!

10 : – ما تستخدمش الموبايل فى اى حاجة تخص شغلك او عملاء شركتك والا العميل هيبصق عليك انت والشركة .

اهداء لكل القاهريين

مش عارف اكمل لان ورايا شغل متلتل

اهم حاجة عايزكم تشاركونى الرأى فى الكلام دا وتجاوبوا على سؤال التدوينة :-

هل فعلا مفروض ان ما اقومش من مكانى لاى شخص سواء راجل او ست كبار السن او بنت شابة ؟ ولماذا ؟

اشكركم على سعة صدركم واتمنى لكم مواصلات هادئة دائما

يوماً سعيداً… 🙂