سواق التاكسى الفصيح !
اهلاً بكم , نعم انه السواق الفصيح ! وأقل ما يقال عليه وستثبت لكم التدوينة الاتية وما ساكتبه لكم عن مدى فصاحته , هذه التدوينة قصة حقيقة احداثها حدثت معى اثناء رجوعى من ميدان التحرير منذ اسبوعين , ورحلة عودتى من القاهرة الى صعيد مصر …. ملحوظة التدوينة باللغة العامية
أنا : تاكسى ! محطة رمسيس ؟ السائق : نعم اتفضل !
السائق اخبار التحرير ايه ؟ انا : تمام الحمدلله , ربنا يسترها على مصر الواحد بقى حاسس نفسه فى متاهة كبيرة وفى لعبة قذرة بتحصل
السائق : مصر دى احسن بلد وشعبها احسن شعب وربنا حميها واللى يقولك شعب مصر دا ما ينفعش معاه الا الكرباج فدى نظرية قذرة النظام السابق هو من ابتكرها !!
انا : اكيد طبعاً وحتى لو كلامهم صحيح فدا مع نسبة قليلة جداً من الشعب ومعروفين جدا زى البلطجية او المجرمين والفاسدين من طوائف الشعب ..
السائق : شوف يا افندم , انا عندى حلول للمرحلة اللى احنا فيها دى بس حد يسمعنى , انا نفسى حد يدخلنى فى مداخلة على اى برنامج اعلامى او اى لقاء تلفزيونى او حتى على الراديو ولو كلامى مالوش لازمة ما ينشروهوش , احنا حققنا المستحيل بثورتنا ولازم نحافظ عليها مين فين كان يحلم بكل اللى حققناه دا وفى 18 يوم احنا ممكن كنا نبقى ليبيا رقم 2 والله بس ربنا بيحمى مصر ولازم نحافظ على ثورتنا خصوصاً فى المرحلة دى وانا عندى 4 او 3 حلول وهقولهملك وانت احكم على كلامى !
انا : اتفضل يا افندم ياريت اسمع حلولك لاننا بجد محتاجين لاى حل احنا بيتلعب بينا والله ولعبة قذرة جدا فى الوقت دا اتفضل انا سامعك.
السائق :
اولاً – احنا محتاجين لرئيس فيه صفتين مهمين جدا جدا قبل اى حاجة تانية , ” رئيس قوى و امين ” قوى بأنه ياخد قرارات فى اوقات عصيبة بدون اى ضغط من اى جهة . رئيس امين على شعبه وعلى موارد البلد وعلى مصلحة مصر اولاً وفوق الجميع .
ثانياً – احنا ايه المشكلة لو وقفنا التعليم لمدة سنة !! , انا : نعم ؟ السائق : ايوه الدنيا مش هتخرب ولا هتولع ولا عجلة الانتاج هتقف ومحدش بيموت من الجوع التعليم هو اللى هيساهم فى نهضة البلد بعد جهل اكتر من 30 سنة يا استاذ اسمعنى بس للاخر خلال السنة اللى هنوقف فيها التعليم دى هنعمل التالى وبكل حزم , هناخد كل المدرسين والدكاترة فى الجامعات والاستاذة والمعيدين والنظار وكل اللى شغلهم فى مجال التعليم ونوديهم اكاديمية تعلمهم ازاى يعلموا الطلبة ويطلعوا اجيال ممكن تبدع وتحب بلدها بجد وتنتج فيها ويقدروا يكونوا عند حسن ظن الطلبة , نيجى بقى للطلبة دول مش هيقعدوا سنة من غير تعليم لا الطلبة هنعملهم معسكرات ونعلمهم فيها يعنى ايه وطن ويعنى ايه انتاج ويعنى ايه تعليم ومبادرة وريادة اعمال وازاى تقدر تعمل مؤسسة ناجحة ليك او تختار شغل مناسب ليك هتقدر تبدع فيه وتطلع كل طاقتك ونعلمهم ازاى يحبوا المكان اللى بيتعلموا فيه ويتلعموا مبادىء احترام المدرس , نيجى بقى للمدارس والابنية نفسها لازم لازم كل المدارس والمبانى التعليمية بالكامل يتعملها سنفرة ايوه تنضف كلها وتتطور وتبقى مجهزة بالكامل للطلبة والمدرسين كمان , الطلبة لما يلاقوا مكان نضيف وادامى يتعلموا فيه هيبقى الطالب منتظر الصبح علشان يروح يجرى على مدرسته او كليته او جامعته , والمدرس كذلك هيبقى منتظر بفارغ الصبر اليوم الجديد يبدأ علشان يبدأ يعلم فى الجيل المبدع واللى بقى مؤهل للتعليم .
ثالثاً – فئة الرقيب على الشعب بعد ربنا سبحانه وتعالى ودول هما مين بقى ( الشرطة – القضاء – التموين – الضرائب – الخ ) دول لازم ياخدوا اعلى مرتبات ممكن ياخدوها لو الناس دى ظروفها المادية ارتاحت عمرها ما هتساعد على الفساد او الغش او الخداع او غيره من اللى بنشوفه كل يوم منهم … بكدا اوعدك هتلاقى بلدنا حالها اتصلح بس فى حاجة مهمة قبل كل الكلام اللى قلتهولك دا لازم اولاً الشعب بالكامل وبكل فئاته يتعلم ازاى ( نحترم بعضنا )…
انا : بصراحة مش عارف اقولك ايه انا لو مفكر انك هتقول الكلام دا كنت سجلتلك فيديو ولكن للاسف معاد القطر خلاص ولازم الحقه بسرعة
السائق : انا نفسى الناس يوصلها كلامى يمكن يفيد والله ومصر لسه فيها كتير قوى ولازم نستغله كويس ونحافظ عليه فى عنينا .
انا : اوعدك هنشر كلامك دا كله إن شاء الله اول ما ارجع الصعيد 🙂
ما رأيكم فى السائق الفصيح وفى حلوله ؟
منتظر تعليقاتكم اطيب التحية
رئيس قوى و امين ” قوى بأنه ياخد قرارات فى اوقات عصيبة بدون اى ضغط من اى جهة . رئيس امين على شعبه وعلى موارد البلد وعلى مصلحة مصر اولاً وفوق الجميع .
وعجبتنى جداً فكرته عن تأهيل المعلمين و رواتب الداخليه
فعلاً ممكن السواق دا بمخططه نتخطى مراحل كتير هنمر بيها الفترة الى جاية
ممكن هو يكون شخصية فعالة جداً فى المجتمع بس الزمن الى احنا فيه و الظروف أضطرته انه يكون سواق تاكسى
اللهم أحفظ مصر و شعبها
—————–
تدوينة أكثر من رائعة يا محمود
تعليق أكثر من رائع عزيزى خالد صديق المدونة الدائم أشكرك ولك من خالص واطيب التحية واتمنى مستقبل مبهر لمصر بشبابها 🙂
ردك أسعدنى , و أسعدنى أكثر أعتبارى صديق المدونة , شكراً لك محمود
أحييكم أحبتي في مصر ..
والله مصر فيها عقول وناس فاهمة بس للأسف اللي في يدهم الأمر مخربين صورة البلد ..
طول عمر مصر مرجع للعالم الإسلامي كامل ، وما في شخص ينكر دور الأزهر سابقاً ..
إن شاء الله ترجع مصر أحسن من زمان وأنا متفاءل بالجيل الحالي في مصر جداً ..
استاذى الغالى عبدالله عبيد تشريفك لمدونتى المتواضعة هو وسام شرف لى اتنحى احتراماً وتقديراً لردك على التدوينة واحييك على تعليقك الممتلىء بالحيادية والامل ايضاً لك منى اطيب التحية … 🙂
طب يا رب رئيسنا يبقى سواق تاكسي، لو فاهم البلد حالها يتصلح إزاي… يحرق مبارك واللي جابهم يمسكوا البلد، خلى اللي خايفين عليها وفاهمين إزاي يعملوا منها دولة عظمى في قاع المجتمع.
بالمناسبة، سيتم الإعلان قريبا عن وفاة مبارك، ليس لأنه مات فعلاً ولكن لأن المجلس مش هايعرف يحاكمه…
اهلاً عزيزى مصطفى ,, سأكتب لك جملة واحدة رداً على يأسك هذا
” إنما النصر صبر ساعة ” 🙂
والله هيا التدوينة جميلة و الراجل ده يعنى ما شاء الله عليه فكره حلو و فعلا احنا لو كل واحد فى البلد او مش كل واحد يعنى كل مجموعة خدنا فكرة زى دى منهم ممكن بلدنا دى تتطور بسرعة بس لازم فعلا الشعب كلو يتعلم يحترم بعضه و ربنا يستر على مصر و ربنا يحفظها من الفتن 🙂
ـــــــــــــــــــــــ
تدوينة رائعة يا محمود و انا متابع كل تدويناتك القديمة كمان ربنا يكرمنا ان شاء الله 🙂
حبيبى انت يا محمد شكرا على تعليقك الجميل يا عسل 🙂 وربنا يحمى مصر وينصرنا على الظالمين والفاسدين
اعتقد فعلا حله كويس خصوصا حكايه وقف التعليم لمده سنه , دي فعلا حتكون فرصه مهمه في البلد لاستعاده التعليم المبدع اظهار اكبر قدر من العقول
الراجل ده كﻻم صح جداً جداً جداً والله … بس تعقيباً على نقطة اننا نوقف التعليم الكلام ده مش هيجى فى سنة واحدة … ممكن نخفف اليوم المدرسى لنصف يوم ونقلل اﻻنشطة شوية والنص التانى زى ما بيقول السواق ده !! 🙂 والله المستعان. شكراً على التدوينة ياحودة…
سواق عبقري عجبتني جدا افكاره برجاء نشر التدوينه على تويتر يا استاذ محمود لانها بتبين ازاي الشعب بيفكر …ده احناعندنا عقول جباره
و الله افكارة ممتازة و نناس مثله كتير بس مين يسمع