أرشيفات التصنيف: سياسة

#الحرية_لعبدالله_عاصم

عبدالله عاصم ١٧ سنة في الصف الثاني الثانوي كتب أول كود ويب “HTML” 

1795562_673386996036389_32715609_n

عام ٢٠٠٩ وحصل علي شهادات في تخصصات تقنية وتكنولوجية عديدة منها

ICDL, Adobe Director, Expression Web, Blend & design, HTML & Java Script, ASP .Net, SQL.

لدي عبدالله خبرة ٤ أعوام في التصميم والجرافيك بـ Adobe Photoshop CD6

قام أيضًا بتصميم وإدارة أكثر من ١٠ مشاريع في

“ Expression Blend, E-Learning, ASP.Net, AdobeDirector, Web site”

عمل في مجال صيانة الكمبيوتر منذ أكثر من ٤ سنوات في

“PC & Laptop – Hardware & SoftWare”

حصل علي خبرة ثلاث سنوات في مجال الشبكات

“ Routers , MikroTik”

ساهم بخبربته وإبداعه منذ ثلاث أعوام بمجال برمجيات الويب مثل:

“HTML5 , PHP , jQuery , MYSQL , ASP.net , SQL , Java Script”

يهتم عبدالله بعلوم الكمبيوتر وأنظمة التشغيل المختلفة مثل:

“Windows, Linux, Mac“

يعمل عبدالله علي إصلاح الأنظمة التعليمية وتفعيل التعليم الإلكتروني في المدارس المصرية.

تأهل عبدالله للتصفيات النهائية في مسابقة شركة “ إنتل “ العالمية بكالفورنيا بشهر مايو القادم عن إختراع نظارة تكنولوجية تساعد مرضي الشلل الرباعي في التواصل مع الآخرين بسهولة ويسر وتكلفة النظارة لا تزيد عن ١٠٠ جنيه.

عبدالله عاصم مش إرهابي

#الحرية_لعبدالله_عاصم

مصادر: طالب يخترع جهازا لتمكين مريض الشلل الرباعى من التواصل مع من حوله.. عبد الله: الجهاز عبارة عن نظارة تتبع حركة عين المصاب وتحولها لإشارات صوتية بتكلفة 100 جنيه.. ويؤكد: أعمل لتطويرها فى شبكات التواصل

أعطني إنترنت عادلًا أُعطيك العالم

أهلًا  وسهلًا  أستغرق تحميل هذه التدوينة لديك ما لا يقل عن ١٢٠ ثانية، وتم تحميل الصور الموجودة هنا بجودة أقل بسبب ضعف سرعة الإنترنت لديك بالتأكيد، أبتسم أنت في (أم الدنيا) مصر، حيث لا توجد خدمات آدمية أو إنسانية من أي شركات تقديم خدمات الإنترنت في مصر ولا استثني أي شركة، ستدفع رغم أنفك وسوف نقدّم لك اسوأ الخدمات التي تخطر بخيالك.

3018610-poster-p-next-arab-womens-tech-advantage

تعالوا الأول نعرف إيه هي المشكلة.؟
المشكلة إن شركات تزويد وتقديم خدمات الإنترنت للأفراد والشركات سرعات الإنترنت لديهم (سيئة) بالإضافة إلي أنّ الأسعار مرتفعة مقارنة بالخدمة المقدمة.

من أمتي المشكلة دي.؟
المشكلة تقريبًا منذ بداية دخول الإنترنت للمنطقة العربية وتحديدًا مصر، بس قديمًا ومع بداية تقديم الخدمة كانت الخدمة أفضل من حيث درجة (السوء) لقلة عدد المشتركين.

المشكلة من أمتي؟ وهل قالوا أنها هتتحل.؟ 
مفيش وزير إتصالات من قبل وبعد الثورة ألا ووعد بالتالي (تحسين خدمات الإنترنت) و (تخفيض أسعار الإنترنت). ولم يحدث هذا ولا ذاك بل بالعكس تم تطبيق سياسة الإستخدام العادل بكل الشركات المزودة والمقدمة لخدمات الإنترنت في مصر للأفراد والشركات، ليس هذا وحسب بل ازداد سوء الخدمة من حيث السرعات عن الماضي الضعف ١٠ مرات أو أكثر.

فاصل سريع قبل ما نتعمق أكتر في الموضوع وليه لازم تكمّل قرآية؟

دا كان أحد تعليقاتي علي بوست (منشور) بصفحة #ثورة_الانترنت منذ أيام

شوف في مصر عندنا أقذر خدمة إنترنت يمكن بالمنطقة العربية لكن تعالوا نتكلم بشكل واقعي وعلمي وملموس علي أرض الواقع بعيدًا عن (العواطف) أتكلمت كتير مع مسؤولين من فودافون أو تي اي داتا أو غيرها، وكانوا دايمًا بيجيبوا اللوم علي وزارة الإتصالات المصرية، ما يقدروش يرفعوا السرعات لأسباب كتيرة أهمها البنية التحتية للسنترالات واللي أغلبها شبه مدمر ومليان “ديسلامات” ومش بس كدا عندك كابلات الفايبر دي مسؤولية وزارة الإتصالات أنها تبدأ تحول كل الكابلات لفايبر. طبعًا محصلش الكلام دا ولا هيحصل لأن في مصالح متبادلة، انا مش بقلل من قذارة شركات الإتصالات لكن حابب أوضح ان بداية المشكلة بتبقي من فين، وزارة الإتصالات يليها شركات خدمات الإنترنت يليها المستنفعين من سوء الخدمة وإرتفاع الأسعاد (الموزعين). أتمني يكون كلامي وضح، مع العلم إن متحفظ علي الخدمة بشكل كبير وبتمني من ربنا إننا نحصل علي خدمات إنترنت إنسانية.

في الحقيقة لم أكتفي برد نظري بدون خبرة فأستعنت بصديقي (مهندس شبكات) أشرف أبو المجد وموزع معتمد للإنترنت في منطقة قنا جنوب مصر وكان هذا تعليقه والذي وضّح أكثر المشكلة بشكل علمي وبدون “فتي” اقرأو جيدًا ما قاله وذكره لأنه مهم.

زي ما قلت يا محمود رقم واحد إحنا معندناش بنية تحتيه وكوابل تسمح بالسرعات الي أنت جايبها دي
رقم 2 الشركات أكبر المستفدين فعلا لأن المكسب ال 10 أضعاف مش ضعف ولا أتنين

وزاره الأتصالات دي خليها في حالها دي متعرفش يعني ايه إنترنت فائق السرعه أساسًا

لو عايز حل عملي مش تصريحات وتهريج زي اللي بتسمعه
الحل العلمي السريع ومختصر في الوقت إن شركه محترمه تعمل واي فاي في الجمهوريه كلها من نقاط بث أبراج زي المحمول ودي الحاجه الوحيده الي ممكن تحس وتعرف السرعات الي بتسمع عنها خارج مصر لأن ده تكلفته في إنشاء البرج مش لازم فايبر كامل لكل السنترالات او فايبر تو هوم زي دول أوربا

التكلفه بتكون في إنشاء البرج وفايبر البرج الي حيبث سرعات عليه حتصل منها قوه انترنت فعلية ما بين ال 60 الي 85 % من السرعه ودا شئ كويس لو كانت بدايه السرعات من 2 ميجا مثلا

أغلب السرعات اللي بتعلن عنها الشركات مش بتوصلك ولاحظ انه بيكتبلك بخط صغير سرعه 24 ميجا او اقصي سرعه يتحملها خط التلفون !!!

يعني اسلوب تسويق (رخيص) وبيع مش اكتر

من قبل الثوره بسنة كده أعلنت شركه انتل العالمية انها ممكن تنفذ مشروع واي فاي أو واي ماكس في جمهوريه مصر العربيه وكان رد وزارة الاتصالات وقتها بقياده الوزير البطيخه الي مش بيفهم اي شئ عن التكنولوجيا أو الإتصالات (طارق كامل) إن مصر غير محتاجه لشبكه واي فاي والانترنت يعمل بكفائة !!

دي وجه نظري لو الدولة او الوزاره عايز تحل المشكله دي بسرعة وبدون تكلفة تحديث البنية التحتية لأن علشان نشوف السرعات العالمية المفروض تكون الدولة فايبر تو هوم مش وصله توم هوم.

 

 

عُدنا طبعًا الكلام السابق من (أشرف أبو المجد) منطقي جدًا ويحتاج إلي التأمل والتفكير من وراء ضياع فرصة وعرض من شركة مثل “INTEL” العالمية ولماذا تم الرفض بحجة أنّ خدمات الإنترنت في مصر جيدة وتعمل بكفائة، طبعًا أعتقد إنكم عرفتوا الإجابة واللي قولتها في الأعلي إن الموضوع عبارة عن شبكة مستفيدين مش كيان ولا أتنين لا دي عبارة عن أفعي ليها “زنكليون” رأس.

طيب محتاج تركزوا في المشكلة بشكل عام مش داخل مصر بس لأ داخل المنطقة العربية وتحديدًا الدول (الفقيرة والنامية) واللي إحنا دولة منهم

الفيديو من إنتاج: البنك الدولي

عُدنا بعد الفيديو إيه إحساسك لمّا (البنك الدولي) بنفسه ببيعرض عليك المشكلة وحلها بيكون إزاي؟ السبب الرئيسي هو إحتكار بعض الشركات الخاصة لتقديم وتزويد الدول بالإنترنت، وطبعًا بيكون بالإتفاق مع الحكومات وكله ياكل عيش ويتحرق العميل والمستهلك بالخدمة السيئة المهم أنه هيدفع ورجله فوق رقبته في نهاية الشهر.
طيب تعالوا كمان نستعرض الملف دا وهو ملخص لإحصائيات كتير مهمة لقطاع الإتصالات والإنترنت في مصر لشهر ديسمبر ٢٠١٣ يعني من حوالي شهر والملف دا صادر من وزارة الإتصالات نفسها، تعالوا نشوف الإحصائيات كدا وياريت تخليكوا فاكرين الأرقام كويس، لأنها مهمة بخصوص باقي الموضوع والقضية اللي تهمنا وهي تحسين خدمات الإنترنت في مصر (حق) وليست منّة.

 

Screen Shot 2014-02-18 at 1.57.50 PM
طبعًا مش محتاج أكتب تعليق علي البيانات السابقة لأن الأرقام بتوضح مدي ضخامة أرباح وزارة الإتصالات ويليها ضخامة أرباح شركات الإتصالات وشركات تزويد وتقديم خدمات الإنترنت للشركات والأفراد اللي بتمص دماء المواطنين العاديين اللي زيك وزيي وزي كل اللي بيقروأ التدوينة دلوقتي، والملف من موقع وزارة الإتصالات يعني مش من تأليفي تعالوا بقي نشوف الأرقام اللي توجع البطون وتخلينا نحس بقيمتنا الحقيقة في الحصول علي خدمات الإنترنت في الملف اللي جاي وإزاي إحنا دمنا بيتمص بالبطئ وإحنا ساكتين وراضيين وكمان مش بس كدا ،،،، طيب ما تيجوا نشوف ؟

طيب بعد كل ما سبق لسه مصدق إنك بتاخد حقك؟ لسه فاكر إنك بتدفع علي قدّ ما بتاخد لو مش مصدق إنك بتاخد حقك يبقي مبروك أنت معانا من الأحرار (البطاريق).
طيب تعالوا نتكلم جدّ شوية هيحصل إيه لو الإنترنت في مصر سريع  وبدفع إشتراك شهري أو سنوي عادل ويساوي السرعة التي سأحصل عليها.
في فيديو مهم ممكن يلخص المشكلة في ١٠ دقايق هو طويل لكن يستحق المشاهدة

 

عدنا، إيه رأيكم ؟ الفيديو بيلخص كل المأسآة في ١٠ دقايق، طيب تعالوا نشوف إجابات الشباب والبنات في مصر هيعملوا إيه لو الإنترنت عندهم سريع وعادل ؟

 

لو شايف أن من حقك الحصول علي إنترنت آدامي وإنساني بقدر ما بتدفع تحصل علي خدمة محترمة وسريعة شارك التدوينة دي علي فيسبوك وتويتر وأنشرها لكل اللي تعرفهم،

تقدروا تتابعوا الصفحة الرسمية لـ #ثورة_الإنترنت 

وطن

وفقدت يا وطني البكارة، لم يعد بيني وبينك عمار يا وطني، أشعر بالعار والخزي من كوني أنتمي إليك يا وطن…
معذرة يا صديقي أعلم أنّ  برقياتي السابقة الأولي والثانية قد أفزعوك من بؤس وطني ولكن لا عليك، هذا هو الواقع ولا أجمّله لك أو أرسمه من وحي خيالي، شئت أم أبيت.
أوهمونا بوعود وعهود  ثم خانوا كل تلك الوعود والعهود، بلا إستثناء يا صديقي حامل الصليب وحامل المُصحف، حتي الملحدين الكفّار يا صديقي خانوا كل ذلك مع من سبق ذكرهم.
ماذا.؟ هل جننت.؟
كلا البتة أنا بكامل قوآى العقلية والصحية يا صديقي.
أشعر يا صديقي بأنني أعيش في كابوس لا ينتهي… حتي وأنا أكتب هذه التدوينة لك لا أعلم هل هذا الكلام مفهوم أنه عفن لغوي ؟

آسف لن أستطيع الإستمرار في الكتابة.

كُن بخير يا صديقي.

 

الوصايا العشر للشباب للأمام [حسن البنا] !

السلام عليكم ، هذه التدوينة أكتبها بناء على طلبات بعض الأصدقاء الأعزاء الذين أتابعهم ويتابعونى عبر موقع التواصل الاجتماعى تويتر ، وهى تتحدث بشكل مختصر عن كتاب الإمام الشهيد بإذن الله تعالى [حسن البنا] «واجبات الأخ المسلم» طبعة أولى سنة 1407 هــ وجدتها بالصدفة اثناء التنقيب فى مكتبة والدى الحبيب 🙂
هيا بنا نبدأ …
فى بداية الكتاب يبدأ بكلمة للشهيد بإذن الله تعالى [سيد قطب] .. فقال «يجب أن تكون هناك محاضن لتربية الأفراد تربية إسلامية . هذا هو الأساس ، وفى هذه المحاضن يجب أن يعرفوا بشيء من التفصيل ما هى صورة الحياة الإسلامية الكاملة … ؟ التى ينبغى أن يحاولوا تحقيقها والتى يدفعهم إليها وجدانهم الديني» – سيد قطب. من كتاب «دراسات إسلامية.»
• أيها الشباب :
إنما تنجح الفكرة إذا قوي الإيمان بها ، وتوفر الأخلاص فى سبيلها ، وازدادت الحماسة لها ، ووجد الاستعداد الذى يحمل على التضحية والعمل لتحقيقها . وتكاد تكون هذه الاركان الأربعة : (الإيمان ، الإخلاص ، الحماسة والعمل) من خصائص الشباب لأن أساس الإيمان القلب الذكي وأساس الأخلاص الفؤاد النقى وأساس الحماسة الشعور القوى وأساس العمل العزم الفتى وهذه كلها لا تكون إلا للشباب ومن هنا كان الشباب قديماً وحديثاً فى كل أمة عماد نهضتها وفى كل نهضة سر قوتها وفى كل فكرة حامل رايتها .
«إنهم فتية ءامنوا بربهم وزدناهم هدى»
ومن هنا كثرت واجباتكم .
ومن هنا عظمت تباعتكم .
ومن هنا تضاعفت حقوق أمتكم عليكم .
«من كتاب مجموعة الرسائل» للأمام حسن البنا رحمه الله … صفحة [81]
من هنا ثقلت الأمانة فى أعناقكم .
ومن هنا وجب عليكم أن تفكروا طويلاً وأن تعلموا كثيرا ..
وأن تحددو موقفكم …
وأن تتقدموا للإنقاذ …
وأن تعطوا الأمة حقها كاملاً من هذا الشباب .
من الوصايا العشر :
١- قم إلى الصلاة متى سمعت النداء مهما تكن الظروف .
٢- أتل القرآن أو طالع أو استمع أو اذكر الله ، ولا تصرف جزءاً من وقتك فى غير فائدة .
٣- إجتهد أن تتكلم العربية الفصحي فإن ذلك من شعار الإسلام .
٤- لا تكثر الجدل فى أى شأن من الشئون أيا كان ، فإن المراء لا يأتى بخير .
٥- لا تمزح فإن الأمة المجاهدة لا تعرف إلا الجد .
٦- لا تكثر الضحك فإن القلب الموصول بالله ساكن وقور .
٧- لا ترفع صوتك أكثر مما يحتاج اليه السامع ، فإنه رعونة وإيذاء .
٨- تجنب غيبة الأشخاص وتجريح الهيئات ولا تتكلم إلا بجد .


هذا ملخص بسيط من كتاب الشهيد الإمام حسن البنا «واجبات الأخ المسلم» الطبعة الأولى نقلتها إليكم كما هى بدون أى تعديل أو تحريف ..
أتمنى أن تنال التدوينة على إعجابكم
• ملحوظة التدوينة كتبتها عبر هاتفى {بلاك بيرى}..
تحياتى 🙂

صعيدى مع سبق الإصرار والترصد ؟

سلام عليكم ,, خلاص صعيدى ايوة ومع سبق الاصرار والترصد كمان , ومفيش عنوان مثالى غير العنوان دا يمكن الكلام دا هيجى على جرح ناس كتيرة ويمكن ناس كمان ممكن تشتمنى وممكن ناس تلعن اليوم اللى قرت فيه التدوينة دى لكن انا أملى فى ربنا كبير قوى لاصحاب الضمائر فقط ,

دايماً بنشوف الاعلام والجرايد وكل وسائل الاعلام فى مصر ازاى بقت جميلة بعد الثورة وبتهتم بالصعيد ! فعلاً الثورة اثرت تأثير ايجابى على الصعيد وبقى ياخد حقه الاعلامى ,

——

طيب سؤال على هامش الكلام فى الاعلام والصحافة حد يعرف كام عدد محافظات الصعيد ؟

طيب حد يعرف اى محافظة بالصعيد فيها اعلى نسبة ” امية ” فى مصر ؟ طيب سؤال اسهل من كدا هل حد يعرف اكبر جامعة فى الوطن العربى من حيث المساحة والاقدمية ؟ طيب سيبكم من دا كله حد يعرف اكبر مصنع لانتاج الالومنيوم فى الوطن العربى من حيث المساحة فين !!

ما علينا ايه الاسئلة اللى ملهاش طعم دى يا عم الصعيدى انت؟ ما تدخل فى الموضوع وتنجز مش كفايا علينا العيال اللى خربوا البلد وعاوزين يولعوا فيها ؟

—–

حسناً  ندخل فى الموضوع ,,,

انا كشاب صعيدى اتولدت فى اقصى الجنوب بمصر محافظة قنا , شاركت وغيرى شارك فى الثورة باى طريقة او وسيلة كانت وفى شباب كتير وبنات من صعيد مصر من كافة المحافظات شارك فى الثورة العريقة العظيمة ثورة 25 يناير علشان تغيير حرية عدالة اجتماعية  !!!

عدالة اجتماعية , ونحط تحتها الف والف خط احمر وهقولكم ليه

لما يكون فى قرى فى الصعيد معندهاش كهرباء والسد العالى اقرب نقطة ليها ! وفى ذات الوقت محافظات اخرى تستمتع بالكهرباء ليل نهار ! الصعيد مميز بالجو الحار صيفاً والجو البارد شتاءً تخيلوا اسر على قد حالها فى البرد دا من غير كهرباء وضعهم بيكون ازاى ؟

عدالة اجتماعية فى توزيع الكهرباء ايوة واللى حتى الان ما حصلش ومئات من القرى مفهاش كهرباء

عدالة اجتماعية فى الحصول على رغيف العيش ابو 5 قروش اللى علشان واحد زى حالاتى يشتريه لازم اروح للمخبز الساعة 6 الفجر لان المخبز مش بيوزع عيش غير من 6 الصبح لغاية 7 ونص وبعد كدا بح خلاص مفيش عيش تصيم لغاية بكرة وطبعاً فى ذات الوقت الصعيد معروف ومشهور بزراعة القمح , وفى ذات الوقت فى ناس رغيف العيش بيوصلها لغاية باب البيت ! اين العدالة هنا ؟

منذ ايام وانا فى البيت فى بنت صغيرة تقريباً عندها 9 سنين بتعيش فى ” عزبة ” قريبة منى وانا عايش فى مدينة ومجمع سكنى وكانت بتبيع ” خضار ” وبتلف على البيوت وشايلة ” المقطف ” على دماغها وزنه ما يقلش عن 20 كيلوا , سالتها بكل عفوية قليلى يا بنتى انتى نفسك في ايه بعد ما عملنا الثورة دى اكيد انتى سمعتى بيها طبعاً , قالتلى بدون تردد ايوة يا ساعدة البيه كنت بشوف الشباب والثورة على التلفزيون نفسى اشترى العيش فى اى وقت وبسهولة واقدر اكمل تعليمى والاسعار ترخص !!

طبعاً الردود انا متوقع شكلها هيكون ازاى على الموقف دا وان فى ناس كتيرة هتكتب لا يا حبيبى الموضوع منتشر فى كل مصر مش فى الصعيد بس !

انتبهوا يا سادة نحن فى الصعيد لسنا احسن من غيرنا , نحن هنا ننحت فى الصخر , نحن نتقاتل من اجل التوعية وفضح الفساد !

الصورة ليست كما ترونها فى الاعلام القذر او الصحافة المضللة الصورة ليست زاهية كما ترونها دائماً , الموضوع بشع بشع بشع

ايها السادة نحن 9 محافظات

الفيوم

بنى سويف

المنيا

اسيوط

سوهاج

قنا

الاقصر

اسوان

الوادى الجديد

البحر الاحمر

 

{صعيد مصر – ويكيبيديا، الموسوعة الحرة http://bit.ly/zeIJFV }

عدوا يمكن فى محافظات تنتمى للصعيد ولا اعلمها

كل يوم يوم ببكى بدل الدموع دم , كل يوم نفس المنظر بتاع القتال على مخابز العيش , كل يوم نفس البنت اللى بتبيع الخضار وبتلف على البيوت وسابت تعليمها كل يوم قرية جديدة مش وصلها نور كل يوم حرب على اسطوانات الغاز كل يوم ناس بتحارب علشان تحصل على الجنيه فى شغلها

—-

انا مش عايز اسود الصورة فى نظركم لكن الناس بتستهين بالصعيد بل فى ناس بتتعمد انها تظهر الصعيد فى ازهى وانقى صورة

قسماً بربى الصورة اسوأ مما تتخيلون , الناس الغلابة المزراعين الناس اللى على باب الله اللى رزقها يوم بيوم كل الناس دى بتقول بكرة هيكون احلى والحال هيتعدل وحال البلد دى هيتزبط وهيكون فى عيش الناس تشتريه بالساهل فى كهرباء هتوصل لبيوتنا فى مية هتوصلنا وصرف صحى هيوصلنا فى غاز طبيعى هيوصلنا ازمة اسطوانات الغاز هتتحل , الناس بتوصل لمرحلة اليأس هنا كل ما اتكلم مع راجل غلبان على باب الله بيسترزق احياناً بيسب لليوم اللى اتعملت فيه الثورة , كل ما اتكلم مع سواق تاكسى برضه بلاقى احياناً نفس الكلام دا وانا هنا مش بعمم طبعاً انا بسجد كل يوم شكر لله على الثورة ,

—–

لكن من حق الناس تحس باى تغيير يا عالم اى تغيير ولو حتى الاعلام يسلط الضوء على الصعيد بما يرضى الله ويرضى اى بنى ادم زى حالاتى عايش فى الصعيد , قسماً بربى كارثة حين يكون هناك 9 او 10 محافظات بصعيد مصر ولا ينشر خبر او برنامج لهم على القنوات او الجرايد الا فى المصايب او الاسطوانة المشروخة والتى كانت من تأليف النظام البائد ” الفتنة الطائفية ” اين ضمائر المصريين اين من ينادون بالديمقراطية ! اين من يتقاتلون من اجل كراسى البرلمان ! هل سنرى التغيير يوماً ما هل سوف اشترى الخبز ذا ال 4 قروش فى اى وقت احب ؟ ام ليس من حقى ؟ هل الغلابة هيوصلهم نور ومية وهما اقرب ناس للسد العالى !

——

استحلفكم بالله نحن لا نريد مساعدة من احد , نحن نحتاج الى تحكيم ضمائرنا فقط واقامة العدالة الاجتماعية فى مصر بالكامل وليست بعض المحافظات فقط , نريد عدالة فى الاكل فى الشرب فى العمل فى التوعية فى الاعلام فى الصحافة فى فى فى والقائمة كل يوم بتطول اكتر واكتر

——

لما احب اشترى كتاب جديد او احضر فيلم نفسى اتفرج عليه فى سينما او عايز احضر مؤتمر معين او نشاط تنموى معين او لو عايز اشترى قطع غيار للاب توب بتاعى او العربية بتاعة والدى او لما احب اخد منحة معينة من البلد عارفين لازم اعمل ايه لازم اسافر 9 او 8 ساعات للقاهرة علشان اعمل دا كله ! واحياناً اكتر من كدا ومحتاج 150 جنيه مصاريف مواصلات الذهاب والعودة فقط ! طبعاً الكلام دا ميت الف مرة اكتبه واقوله واسمه معروف وفى ناس كتيرة بتعانى منه مش فى محافظات الصعيد بس لا بل فى محافظات الدلتا كمان ودى كانت صدمة وطامة كبرى لما اصحابى اللى فى محافظات الدلتا اشتكوا نفس الشكوى

تباً للـــــمــــركـــــــزيــــــــة ومن يدعمها حتى الان

——

نيجى بقى لاصحاب المبادرات الرائعة والمؤسسات الاروع واللى هقوله دا عانيت منه بناء على تجربتى الشخصية , بمجرد اى مبادرة او منظمة او مؤسسة بتنطلق ربحية او غير ربحية لما تيجى تكلمهم وتقولهم فين الصعيد ! يقولك الله احنا هنموت ونوصل للصعيد هنتجنن وندخل الصعيد وان شاء الله هندخل ونخترق الصعيد بالكامل وخليك متابع معانا لاننا هنحتاج مساعدتك معانا كلام كلام كلام كلام ونيجى وقت الجد لا حياة لمن تنادى وفعلاً اى مؤسسة او منظمة او مبادرة كبيرة بتقول انها عملت انجاز فى الصعيد فانا بتعتبر الكلام دا كدب فى كدب لان الصعيد مش صغير ولا بيت او اتنين او قرية او اتنين او محافظة او اتنين ,,, طبعاً مع كامل احترامى لقلة من المؤسسات والمبادرات اللى فعلاً اخترقت الصعيد وبدأت بجد تساعد فى تنمية وتوعية وتطوير الصعيد ومحافظته

——-

تصدقوا بالله ! لا اله الا الله انا كمحمود جالى عروض شغل كتيرة وخصوصاً الشهر اللى فات دا وبرضه رفضت مش لان الشغل مش عاجبنى لا بقول بكرة هتروق وتحلوا فى الصعيد وما ينفعش اسيب الصعيد كدا وامشى لازم اساهم واطور واساعد فيه على قد ما اقدر وبحاول اعمل تويت اب او ميت اب او اى تجمعات للشباب المبادر وبتنطط كل شوية من محافظة لمحافظة على أمل انى اقدر اساهم فى اى حاجة حتى لو كانت بسيطة انا مش بقول الكلام دا ك كبرياء او فخر الخ لا بس علشان الناس تعرف اننا بننحت فى الصخر انا او غيرى من الشباب , ورد برضه على اللى هيقول ما تبدأ انت بنفسك يا عم الحج وبطل الكلام اللى مليان احباط دا ورد على اى واحد هيشتمنى برضه 😀

——-

اتمنى تفكروا فى الكلمات دى بعد ما قريتوا كل الكلام اللى مالوش لازمة فوق دا لو بتحبوا بلدكم بجد

مركزية
عنصرية
امية
تعليم
خبز
كهرباء
ماء
صرف صحى
غاز طبيعى
توعية
مؤسسات
مبادرات
انشطة
لو شايف ان نشر الكلام دا مهم لغيرك وهيفيد بلدك فى تسليط الضوء على الصعيد انشره

جميع حقوق النشر محفوظة لكل مصرى حر عنده ضمير !

انا دايماً مبتسم حتى شوفو الصورة اللى فوق دى 🙂

انا دايماً بقول بكرة احلى وعندى امل فى ربنا كبير مهما كان الكلام اللى كتبته كله حزن وفقدان للامل لكنها الحقيقة

وبكرة أحلى إن شاء الله

إمضاء صـــعــــيدى